Ev demeke Amerîkayê hewl dida ku xwe li Qefqasyayê bi cih bike. Bi riya pirsgirêkên neteweyan û dewletên ku ji Rûsyaya mezin veqetiyane tevliheviyan çêbike û bazara gazên xwezayê bike destê xwe. Li aliyê dîtir bi riya dewletên biçûk Rûsyayê kontrol bike. Her çiqas bi quweta Rûsyayê a nukleer bizanibe jî carna dikeve nava hewldanên wisa ku Rûsyayê pê dipîve. Li gorî min ev şerê ku di navbera Gurcistan û Rûsyayê de pêk tê yek ji plan û pîvanên Amerîka–Rûsyayê ne.

Bi rastî mirov matmayî dimîne ku bi fermana Serokwezîrê Gurcistanê Mihail Saakaşvili hêzên Gurcistanê li hember Rûsyayê dikeve Osetyayê. Weke provakasyoneke ku destpêka şerê Iraqê tîne bîra mirovan. W ekî tê zanîn Sedam bi carekê ve Quweyt dagir kiribû û bûbû sedemê hatina hêzên Amerîkayê.

Lê di şerê Gurcistan û Rûsyayê de wekî dêwekê ji xewê şiyar bibe tevgeriya û di nava çend rojan de wekî cîlîndîrekê di ser Gurcistanê re gêr bû. Heger peymana aştiyê çênebûya roja heftê Rûsyayê paydextê Gurcistanê bi dest xistibû.

Vê gavê tansiyona şer daketiye lê nakokiyên di navbera Ukranyayê û rûsan her dem derbas dibe zêdetir derdikevin holê. Li aliyê Osetyaya Bakur û Abhazya piştî dagirkeriya Gurcîstanê ew ê bikevin bin tesîra Rûsyayê.

Hinek pispor dibêjin Amerîkayê û Rûsyayê bi minasebeta vî şerî li hev kirine. Li gor senaryoya ku tê gotin heger Amerîka bi Îsraîlê li Îranê bixe ew ê Rûsya bêdeng bimîne û li hemberî bêdengiyê ew ê Rûsya siyaseta xwe û nifûza xwe li Qafqasyayê xurt bike.

Hinek pispor tarîxa êrîşa ku li hemberî Îranê pêk bê, di navbera 4 û 19 meha dehan de tînin ziman. Di 4’ê mijdarê de hilbijartinên Amerîkayê dest pê dikin û 20’ê çilê de serokwezîreke nû tê ser text. Di vê navberê de Bush wê bi helwesta ’with nothing to lose’ tevbigere.

Tirk winda dikin

Kî li kê bixe bila bixe wê tirk winda bikin. Tirkan di şerê Iraqê de li kêleka Amerîkayê cih negirt hîn jî rastî cezayên Amerîkayê tê. Vê carê jî Rûsya piştî şer wê cezayekî baş bide tirkan. Erdogan bê sedem çûyîna Rûsyayê nayne rojevê û Ehmedînejad nayê Enqereyê.

Rojnameyên cîhanê provokasyon û destekên tirkan ên Qafqasyayê pir aşkera lı rûpelên xwe bi cih kirin.

Me ji berê ve gotiye bayê siyasetê li dij tirkan digere û firsetên ku kurd li gor siyasetên navneteweyî tevbigere ketiye destên kurdan. Komara Tirkiyeyê li ser înkar û tunebûna gelan hatiye avakirin û ev ji her dem piştkuliya tirkan e.

Di demên pêş de wê Qafqasya û der û dora Kurdistanê germ bibe. Heger kurd li gorî berjewendiyên netewî tevbigerin wê desketiyên mezin bi dest bixin. Bi tenê heger fuzeyên Îranê ku digihijin li Kurdistanê nekeve û gazên kîmyewî yên Îsraîlê nebe sedemê qatlîama kurdan.

Azadiya Welat

Di 15’ê Tebaxê de, Azadiya Welat dusaliya rojanebûna xwe pîroz kir, dil dixwest li Amedê bûma, lê bi serkeftîbûna hevalên ku rojname anîn heta îro gelekî serbilind bûm. 15’ê Tebaxê li xebatkarên rojnameyê û gelê me pîroz be.

Divê hemû kurd, rojnameyê wekî nirxeke xwe ya neteweyî bibînin û ji bo ku ev rojname xurtir be, heta dawî destek û piştgiriya xwe bidinê.