Jina ku ji xwe biyanî bûye lêgerîna nasnameya xwe, têkoşîna guherînê ya ku li hemberî nêzîkatiyên mêr ku jinê wekî yê din dibîne, her dem şer kir ligel hemû zehmetiyan.

Tevlêbûna jinan di destpêkê de li ser esasê pirsgirêka netewî be jî, lê her çû tevlibûnên ku xwe disipêrin nasnameya cewherî ya jinê û lêgerên azadiyê jî digire nav xwe û tevlêbûn bi zanistiya cinsî zêde bûn. Sedema tevlêbûna jinê ya têkoşîna çekdarî derveyî pergalê, nasnameya cewherî ya jinê û ligel derxistina vîna jinê bi têkoşîna azadiyê ya gel re nav hev de azadiya nasnameyê jî armanc dike. Der barê 15’ê Tebax û jinê de siyasetmedar Safiye Erol nêrînên xwe anîn ziman.

JI ÇANDA XWE DÛR KETIN

Siyasetmedar Safiye Erol, bal kişand ser dîroka kurdan û got ku di dîroka kurdan de her tim êş û hezkirin hebû. Erol, diyar kir ku kurd ji kurdîtiya xwe ji çand û rastiya xwe dûr ketibû, şerm dikir. Erol, destnîşan kir ku bi taybetî ji ciwan cilên kurdawarî şerm dikirin û ji ber ku kemalîstan kurd her tim biçûk didîtin, ji bo xwe ji wan bidin naskirin gelek kesê hewl didan ku bi tirkî biaxivin û diketin rewşeke wisa.

Erol, bal kişand ser helwesta dayikên kurd û got ku dayikên kurd wekî ciwanan nebûn her tim bi cilên xwe kurdewarî serbilind bûn û kevneşopiyên xwe diparastin. Li gorî Erol bi saya dayikan gelek kevneşopî winda nebûne ew aliyek rastiya kurdan e.

BÛN XWEDIYÊ NASNAME

Erol, destnîşan kir ku çalakiya 15’ê Tebaxê ne tenê derketina leşkerî ye, çalakiya xwedîderketina çand û ziman e û wiha got: “Ji bo rastiya PKK’ê bê bawerî dihat ferzkirin û tiştek nabe, nêrînek bi vî rengî dihat ferzkirin. Lê heval Egîd û Mahîr çi dibû bila bibe divê têkoşîna çekdarî dest pê bike di vê biryarê de bi biryar bûn û bi îdia bûn. Li dijî paşverûtî divê ev çalakî pêk bihata…”

Erol, da zanîn ku betona ku bi salan e li ser kurdan hate şikandin, kurd tune dihatin hesibandin niha bi têkoşînê kurdan hebûna xwe ispat kir. Erol, da zanîn ku ew zarokên vî welatî ji bo gelê kurd bûn avahîsaz û yek bi yek têkoşîna gelê kurd bilind kirin û wiha gotina xwe dom kir: “Gotineke Rêberê Gelê Kurd Abdullah Ocalan heye ‘Ez bîrê bi derziyê dikolim û rojek bê her kes dê xwedî vê li têkoşînê derkeve.’ Niha her kurdek vê gotinê baştir fêm dike û dinirxîne.”

TEVLÊBÛN ZÊDE BÛ

Tevlêbûna jinê di destpêkê de gelekî qels bû, lê di sala 1990’an de tevlêbûna wan zêde bû, zêdebûna hejmarê hewcedariya artêşbûyînê bi xwe re anî. Heta jin bi xweserî xwe birêxistin kirin. Erol, daxuyand ku bi keda Rêberê Gelê Kurd jin hişyar bûn û dest bi têkoşîna cinsî kir û wiha axaftina xwe dom kir: “Artêşbûyina jinan di sala 1995’an de di dewra YAJK’ê pêk hat. Jinan artêşbûyîna xwe bi saya Ocalan pêk anî.”

JIN DAKETIN QADAN

Erol, daxuyand ku di salên heştî û notî de kesek xwedî hevalên şehîd dernediket, ji ber ku li ser gel zexteke gelekî dijwar hebû. Erol, da zanîn ku niha rewşa kurdan ne wisa ye ji 7’ê bigire heta 70 salî jin, ciwan û kal bi xwe ve hatin û betonên derdora xwe şikandin. Erol, da zanîn ku niha dayikên 70 salî li qadan polîtîkayan diafirînin û zarokên wan li qadên azadiyê şehîd dikevin lê dîsa banga aştiyê dikin û ev tişt ji bo kurdan merheleyeke gelekî girîng e. Ev tişt bi fedakariya hevalên bi rûmet pêk hat.

XILASBÛNA JINÊ...

Erol, got ku axa Kurdistanê bi xwîna bi hezaran têkoşerên azadiyê hatiye avdan, her wiha tevlêbûna jinên kurd girîng bû û wiha axivî: “Jin di têkoşîna xwe de xwedî li netewe, nasname û cinsê xwe derdikeve. Niha ne tenê pêşengiya jinên kurd, pêşengiya jinên din jî dike û di nava cîhanê de jinên têkoşer bûn mînak. Heke azadî hebûya ne Ronahî, ne jî Uta û Amara dibûn. Van kesan rizgarî di nava femînizmê de didît û femînizma rastiyê di nava têkoşîna kurdan de dît. Xilasbûna jinê xilasbûna gel e. Jinan di girtîgehan de qîrîna azadiyê kir û rojên azad xwestin.”

DÊ STRANAN BÊJIN

Erol bal kişand ser Têkoşîna Azadiyê û got ku şehîd Nûda di nêzî 15’ê Tebaxê de jiyana xwe ji dest da. Lê ne tenê Nûda bi hezaran wekî Nûda her tim di dilê kurdan de cih digirin. Erol, da zanîn ku li dijî paşverûtiyê, kuştina bi hinceta namûsê û qetilkirina jinê, jinên ciwan ala azadiyê bigirin û bimeşin rojên pêş û bi tilîliyên dayikan li serê govenê bimeşin rojên azad. Erol, da zanîn ku kes dengê çekan naxwaze her kes dixwaze ku stranên aştiyê bistire û her wiha şûna keviran divê gul hebin.

Erol, got ku divê her jin xwedî li Rêberê Gelê Kurd Abdullah Ocalan derkeve û bi reng û têkoşîna xwe li dijî van rojên dijwar derkevin.