QANDÎL - Alîkarê Serokê Konseya Rêveber a Koma Civakên Kurdistanê (KCK) Bozan Tekîn, destnîşan kir ku sîstema şerê taybet a tirk li ser êşên dayikan siyasetê dimeşîne û diyar kir ku heta dayik dest neavêjin berstûka paşayan pirsgirêk çareser nabe. Tekîn got; ‘pêwîst e dayikên tirk bêjin, Kurdistan ji me re çi, çi karê me li wir heye?’

Alîkarê Serokê Konseya Rêveber a KCK’ê Bozan Tekîn ku windahiyên dawî yên Artêşa Tirk ên di şerên dawî de bi bîr xistin bang li dayikên tirk kir. Tekîn ku strana gelêrî ya bi navê ‘Yemen ji me re çi’ bi bîr xist û destnîşan kir ku ew nirx didin girîn û êşên dayikan lê belê pêwist e dayikên leşkeran bibînin ku tên xapandin.

Tekîn destnîşan kir ku rewşa niha ya êşên dayikan jî mîna strana li ser sefera Yemenê ya dibêje “Yemen ji me re çi” ne cûda ye û wiha berdewam kir: “Paşayên Osmanî û begên wê demê zarokên gel ên kedkar û xizan şandin çolên Yemenê ji bo mirinê. Yê çû paş de nehat. Ji ber vê yekê jin bî man, zarok sêwî man.”

‘Divê bêjin: Kurdistan ji me re çi’

Tekîn ku beşên stranê yên mîna, “Ji begê xwe bawer nebin, Yemen ji me re çi? Binêrin zarok sêwî man” mîna destnîşankirina rastiya wê demê binav kir. Tekîn diyar kir ku tu berjewendiyên dayik û kedkarên tirk ji mêtîngerkirina Kurdistanê tune ye û bang li dayikên tirk kir ku îro ew karibin bêjin, “Kurdistan ji me re çi?” Tekîn ji bo çareseriya pirsgirêkê jî ev nêrîn anîn ziman: “Heke gelê tirk, jinên tirk bikevin cudahiya vê xapandina mezin. Hişyar bibe ku divê bi paşa û began bawer nebe û destê xwe bavêjin berstûka paşayan wê demê çareserî dikare pêk were.”

Tekîn banga xwe ya ji bo dayikan bi van gotinan bi dawî kir: “Gelek xwîn rijiya. Ji bo anîna rojevê ya êşên tên kişandin berpirsiyariyeke girîng dikeve ser milê hunermendan. Îro ji Yemenê jî girantir êş tên kişandin.”

‘Êşên me yên hevpar neman’

Alîkarê Serokê Konseya Rêveber a KCK’ê Tekîn hişyar kir ku heke şer berfirehtir bibe êdî kes dê nikaribe pêşiyê bigire û got, “Heke şer carekê bilind bibe, kes nikare texmîn bike ka encam wê bibe çi.” Tekîn ku têkiliyên kurd û tirkan jî anîn rojevê destnîşan kir ku israra di şer de û operasyonên berfireh di têkiliyên dîrokî yên kurd û tirkan de şikestineke mezin pêk aniye û wiha axivî: “Niha êş û şahiyên du netewên cûda hene. Êş û şahiyên me ên hevpar tune ne. Fikar û xemgîniyên me yên hevbeş nîn in. Ji êşên me re alê hildidin. Wê çawa tiştekî hevbeş bimîne!”

‘Divê ciwanên kurd leşkeriyê nekin’

Tekîn mijara leşkerên bi eslê xwe kurd ên di nava Artêşa Tirk de cih digirin û di şer de têne kuştin jî mîna, ‘Trajedî’ binav kir. Tekîn aşkera kir ku di nava kurdan de beşekî ku di nava xemsarî û xefleteke mezin de heye û têkildarî mijarê ev nirxandin kir: “Şerek heye, vê yekê dizanin lê dîsa jî diçin şer. Ji hilgirtina çeka hêza mêtînger ya dixwaze wan tune bike mezintir rewşeke ku nayê qebûlkirin tune ye. Tekîn bang li ciwanên kurd kir da çeka Artêşa Tirk êdî hilnegirin.