ÊLIH (DÎHA) - Li Navçeya Sason a Êlihê dema wesayîtek sivîl a tê gotin tê de cerdevan jî hene derbas dibû, teqîn pêk hat. Di encama teqînê de 3 kesan jiyana xwe ji dest da, 5 kes jî birîndar bûn. Rewşa 3 kesan xeter e. Walî Recep Kizilcik diyar kir ku di mînîbûsa bûye hedef de, cerdevan jî hebûne.

Wesayîta ku ji Bajaroka Cacasê rêwî dibirin navenda Sasonê, ajokarê wê Riza Bozkurt, plaqeya wê jî 72 M 0780 bû, dema di nêzî Mezra Yuvarliçayê re derbas bû, teqîn çêbû. Di encama teqînê de gundiyên bi navê Selîm Çelîk, Abdulmecît Akman û Mehmet Can Yaşar jiyana xwe ji dest dan û 5 kes jî birîndar bûn. 3 ji kesên ku rewşa wan xeter e, bi helîkopterê rakirine Amedê. 2 kesan jî rakirin Nexweşxaneya Dewletê ya Êlihê. Waliyê Êlihê Recep Kizilcik, piştî bûyerê bi helîkopterê çû herêmê. Hêzên ewlehiyê, li vê herêmê dest bi operasyonek berfireh kirin.

Daketin û derketin hatin qedexekirin

Kizilcik ê piştî lêkolînê li vir daxuyaniyek da, wiha got: ''Di bûyerê de mînîbusa ku gundî tê de bûn, bûye hedef. Li gorî texmîna me, ji dûrî ve teqandine. Di mînîbusê de cerdevan jî hebûn. Me helîkopter şand cihê bûyerê." Di bûyerê de Veysel Gun, Nîhat Çakici, Mehmet Aslan, Mahmut Aslan û Medenî Çelîk birîndar bûn. Hate hînbûn ku tişt bi ajokar Riza Bozkurt nebûye. Cendirmeyên ku li cihê bûyerê dest bi lêkolînan kirin, daketin û derketinê qedexe kirin. Xizmên birîndaran li ber deriyê Nexweşxaneya Dewletê ya Êlihê jixwe çûn. Şaredarê Sasonê Îrfan Arslan jî li vir axaftinek kurt kir. Arslan, da zanîn ku bûyer serê sibê saet derdora 09.20'an de çêbûye û 3 kes mirine. Arslan, got ku nizane ka di wesayîtê de cerdevan hebûye an na.